2013開始冇耐，唔少玄學家已經對今年股市、樓市作出預測，筆者就左耳入右耳出，皆因都唔會有閒錢入市，事關早前預覽咗Hot Toys今年嘅新作巡禮，恐怕全年薪金加雙糧都要奉獻，除咗早已事先張揚嘅《Iron Man 3》、《Robot Cop》及《G.I.Joe》，就連《Batman：The Dark Knight Rises》竟然仲有「大作」面世，加埋《Prometheus》及《Sleepy Hollow》都會加入1/6 Action Figure行列，咁搞法，睇怕你我他嘅廣大Figure迷，今年預咗幫HT打工都似！
啱啱被國際足協選為年度最佳領隊嘅迪保斯基（Vicente Del Bosque），經常面對「幸福嘅煩惱」，事關手下球員個個都勁到屈機，魚與熊掌，都唔知揀邊個打正選、邊個做後備。今年Figure迷都要有呢種煩惱，事關《G.I.Joe》、《Iron Man 3》、《Superman：Man of Steel》、《Thor：The Dark World》等今年排住隊上嘅大片，HT都計劃Figure化，就連明年先上嘅《Captain America》第二集，今年都要整定先，仲未計總舵主Howard收收埋埋嘅意外驚喜，Figure迷「買？唔買？」嘅心理掙扎，今年一定多過舊年。
重出江湖 鐵人半胸像
HT全體上下今年勢必做到氣咳，目的除咗令粉絲有幸福嘅煩惱，更希望帶出Figure唔只頭雕咁簡單嘅訊息，佢哋強調旗下產品好注重整體性，由細節、比例、服飾、塗裝，都係出盡12成功力，而且範疇唔只1/6及1/4嘅Action Figure，仲有場景、Vehicle等多元化發展。好似以往都有嘅1/4 Iron Man半胸像，今年就趁住《Iron Man 3》重出江湖，Mark VII及Mark XL VII嘅試辦已經大功告成，實物所見，細緻度以及金屬感塗裝都貫徹高水準作風，當然唔少得發光Gimmick。不過貪心係人嘅天性，電影中同樣搶鏡嘅國旗Look War Machine，HT唔會唔做啩？
夜神再襲 1/12 The Bat
《Batman：The Dark Knight Rises》嘅男、女主角，即係Batman及Catwoman，仲有大奸角Bane嘅1/6 Figure，以及同比例嘅Bat Mobile及Bat Pod，舊年已經發表咗（Batman仲加碼出埋1/4），蝙蝠俠熱潮應該歇一歇啦？原來仲未，事關今年有破天荒嘅1/12蝙蝠戰機「The Bat」，雖然唔係舊年動漫節展出嘅1/6咁誇張，不過驟眼睇都有1/6 Bat Mobile咁大部，而且唔只得個樣，機底一對螺旋槳、以及正面一對扇葉都有電動功能外，仲有發光呢招。雖然試辦仲未有同比例嘅Batman現身，不過HT都話好想做埋，相信廣大嘅Batman粉絲都會祝佢哋心想事成吧！
腿功大躍進 新版ED 209
除咗The Bat，大型Vehicle仲有《Robot Cop》第一集出過嘅ED 209，比例同5年前嘅舊作一樣，都係1/6，不過由比例、雕工以至可動性，都有大幅提升，尤其是舊作對腳接近零可動，新版一於全面強化，最明顯係膝蓋可以上下移位，而且相當實淨，夠力撐起上半身。美中不足係試辦仲未完成塗裝，不過以HT一向嘅功力，大家都唔使過於擔心，不如愁吓屋企仲有冇位擺得佢落好過。
能屈能伸 1/4 T-800
舊年發表嘅1/4 T-800 Endoskeleton，今年第一季就會派貨，唔只標榜大比例、金屬塗裝及細緻度，HT仲好想藉呢款作品，證明佢哋對可動性同樣高度重視。就實物所見，雖然大比例，但係舉臂、拗腰，甚至單膝跪等大動作都一一做到，而且關節實淨，唔會擺好甫士冇耐就變番軟腳蟹，呢番苦心，各位Terminator粉絲應該收到啦！
神秘試辦Snap Shot
除咗以上新作，今次上到HT總壇，仲見到多款尚待版權商審批嘅試辦，雖然仲未可以用全相真面目示人，不過由題材到造工已經令人充滿期待，好似便服造型嘅Tony Shark連埋基地場景，製作目的就係將電影中出現嘅震撼場面，原原本本立體化出嚟，畀粉絲可以收藏、欣賞。至於HT一向情有獨鍾嘅Johnny Depp，佢套《Sleepy Hollow》已經係1999年嘅作品，估唔到會喺今年Figure化，咁講法，尊爺喺今年新戲《The Lone Ranger》飾演嘅土著Tonto，又有冇機會接棒出埋呢？

＊除1/4 T-800 Endoskeleton，以上產品售價及推出日期尚未定案。


Iron Man Mark VII 1/4半胸像


Iron Man Mark X L VII 1/4半胸像


1/12 The Bat

机底慨螺旋浆，仲有正面慨扇叶都识转，当然唔少得发光呢招。


1/6 ED 209

试办慨膝盖可以上、下移位，仲够晒实净，大货时都Keep到慨话，唔畀Like都唔得。

唔只膝盖，就连足踝都会追加可动关节，加强接地性。


1/4 T-800 Endoskeleton售价：HK $2,580

之前净系Show咗站立Look，依家示范单膝跪，可动性毋庸挑剔。

唔只手脚等主要关节，五只手指亦都可以独立郁动。


HT版Joker都出得多，呢款造型又出自何处？相信Game迷会最易估到。


头雕仲未见得光，不过尊爷喺《Sleepy Hollow》饰演慨Ichabod Crane，几乎场场戏都必有工具袋跟手，HT仲连里面慨各式道具都做齐。


睇见呢台Tony Shark便服Look加大型变身基地，相信各位铁人迷要及早储定钱喇！


HT已经做定由Mark I到Mark VII 慨Cosbaby试办，睇怕Mark XL VII 都走唔甩啩！


1/6 Iron Man见得多，呢款试办又有何Gimmick？原来系HT新开发慨「半可动」系列，以换件形式摆出唔同甫士，可动性唔及传统慨1/6 Action Figure，但系造型会更加Chok，迎合惟美派玩家慨口味。


《G.I.Joe》嘅Storm Shadow（左），以及《Prometheus》嘅女體Figure（右）都有初辦見人，不過暫時只有Back Look，一旦頭雕審批Pass，我哋即刻再上HT，影齊多角度畀大家睇。